Archive for

يـــلا نرســــم حريـــــة

الحرية ممكن تترسم
وهنرسم الحرية لكل المعتقلين..
…………………………..
يلا نرسم حرية هو معرض فنى مفتوح للشباب من الفنانين التشكيليين ورسامين الكاريكاتير وحتى لاى حد معدى فى الشارع .
مطالبنا هى اعادة محاكمة المعتقلين اللى اتملت بيهم السجون الحربية امام قضاء مدنى عادل والاسراع فى بدء اعادة محاكمة عمرو عيسى وكل اللى بتخرج ليهم قرارات اعادة المحاكمات وما بتتنفذش ، ووقف كل المحاكمات العسكرية للمدنيين.
…………………………
هننزل الاحد الجاى ..
وهنرسم الحرية لعمرو عيسى وكل رفاقه

.

وقفة لأهالي المحكوم عليهم يوم السبت 30 ابريل 5م

تناشد مجموعة ” لا للمحاكمات العسكرية” كل أم مصرية ان تتضامن مع أمهات و أهالي المحكوم عليهم في المحاكمات العسكرية في وقفة صامتة يوم السبت 30 ابريل الساعة 5 م على الرصيف المقابل لمبنى مجلس الشورى في ش القصر العيني .

شاركوا  الأمهات و الأهالي قصص الأحكام الظالمة على أبناءهم و أحباءهم

ساعدوهم ان يصل صوتهم للمجلس العسكري فيعيدوا النظر في قضايا أبناءهم

استمعوا لأم محمد عبد الهادي- 16 سنة, قبض عليه يوم 9 مارس من ميدان التحرير و في ظرف أيام حكم عليه ظلما ب 3 سنين, يقضيها الان في سجن طرة شديد الحراسة

استمعوا لقصتها هنا

ساندوا أهل وليد , عمرو البحيري, رائف, و محمد عبدالله و الاف الاخرين

Documenting April 8th & 9th sit in…توثيق فض اعتصام التحرير 9 أبريل

تناشد مجموعة ” لا للمحاكمات العسكرية للمدنيين” كل من شارك في اعتصام ميدان التحرير يومي 8 و 9 أبريل ان يرسلوا لنا شهاداتهم عن أحداث فض الاعتصام لضمها  لتقرير توثيقي نعمل على تجميعه و تقديمه للجنة تقصي الحقائق المكلفة من قبل وزارة العدل.

يرجى ارسال الشهادات, و اي مادة توثيقية  مصاحبة (فيديو -صور, ..) و بيانات للاتصال بكم ان امكن, على

nomiltrials@gmail.com

موقع المجموعة: https://tahrirdiaries.wordpress.com

“No military trails for civilians” group urges those who participated in Tahrir sit in on April 8th & 9th to send us their written testimonies of what they saw during the dispersion of the sit in. These testimonies will be added to the report we are compiling to submit to the fact finding committee assigned by ministry of justice to investigate events of that day.

Please send us your testimonies & any documented material ( Videos, pictures, ..) , along with contact information if possible on nomiltrials@gmail.com

Blog of the group: tahrirdiaries.wordpress.com

استغاثة من سجن العقرب

استغاثه من سجن العقرب

وصلنا شكوى من مساجين سجن طره شديد الحراسه المشهور باسم العقرب او 990

اكثر من 250 سجين يتعرضون للتعذيب وسوء المعامله من اكثر من يومين:

حرمان من الخروج من الزنزاين

قنابل مسيلة للدموع

قطع الكهرباء والماء

حرمان من الطعام

ضرب

التجريد من الملابس ماعدا الغيار الداخلى

اهانات وتهديدات بالنقل لسجن الوادى الجديد

ويتهمون:

تامر عزام (ضابط )

رضا سمير(ضابط)

مصطفى كامل (مأمور السجن)

عنهم:

محمد خلف عبد الرحيم   0180693645

عبد الرحيم خلف عبد الرحيم

كامل فرج كامل  01523161421

ومن الاهالى:

منار عبد الله محمد زوجة مصطفى محمد الغريب حجازى  0147108601

0193280992

اسكندر 0122109832

ام محمود رمضان 0196219900

نقلا عن:

مركز النديم

للعلاج والتأهيل النفسي لضحايا العنف

3 أ شارع سليمان الحلبي، من رمسيس، القاهرة

دعوة لحضور اجتماع

تدعوكم مجموعة لا للمحاكمات العسكرية للمدنيين
لحضور اجتماعها العام الثاني غدا في تمام الساعة السابعة مساءُ
في مركز هشام مبارك
1 شارع سوق التوفيقية، وسط البلد
في تمام الساعة السابعة مساءً
الدعوة مفتوحة لكل النشطاء والمحاميين والاعلاميين واي شخص مهتم للعمل على هذه القضية
نرجو الحضور في الموعد

وقفة احتجاجية لدعم الطعن على الأحكام العسكرية للمدنيين

دعوة لوقفة احتجاجيه أمام مجلس الدولة أثناء الجلسه لتأييد مطلبنا بتحقيق المحاكمات العادلة لأبناء الوطن

دعوة لوقفة احتجاجيه أمام مجلس الدولة أثناء الجلسه لتأييد مطلبنا بتحقيق المحاكمات العادلة لأبناء الوطن ورد المظالم إلى أهلها بإعادةكافة المحاكمات العسكريه اللتي تمت في الآونه الأخيرة وإعادتها أمام القضاء المدني ليفصل فيها بالحق والعدل بغير تجاوز

…المحاكمات المدنيه للمدنيين حق أصيل لكل مواطن يكفله الدستور والقانون ولا تقل هذا ليس شأني فربما يأتي يوم وتتبدل المواقع وتصير انت خلف أسوار السجون العسكريه وتقل وقتها: أكلت يوم أكل الثور الأبيض

لقد قمنا بثورة لنقضي علي الفساد والظلم ولنطالب بكافة حقوقنا كمواطنين ولم ولن نطالب أبدا باستثناءات…فإن كنا ارتضينا أن يحاكم الفاسدون أمام القضاء المدني فلا يمكننا أن نقبل بأقل من المعاملة بالمثل…فنحن أمام القانون سواء

عار علينا أن نتخلى عن إخوتنا في الوطن وقت حاجتهم إلينا…نحن لا نريد تسريح مساجين ولكننا نرغب في إعادة محاكمتهم أمام قاضيهم الطبيعي

الثلاثاء 19 أبريل الساعة 9 ونص صباحا أمام مجلس الدولة بالدقي
http://www.facebook.com/?ref=home#!/event.php?eid=142787489125028&index=1

لا لمحاكمة المدنيين امام المحاكم العسكرية

مؤتمر شعبي… انضموا لنا في الشارع

لقد قامت في مصر ثورة عظيمة طالبت بالعدالة و الحرية لجميع المصريين. وعلى الرغم من ذلك تعرض الاف المواطنين منذ بداية

الثورة للمحاكمات العسكرية التي تفتقر الى كل أسس العدالة,وحكم على الكثير منهم بأحكام فورية رادعة.

و نظرا لتقاعس وسائل الاعلام المصرية عن اداء دورها و اتاحة مساحة للتواصل مع المواطنين المظلومين فقد قررنا نزول الشارع لبدأ حوار شعبي

تدعوكم مجموعة ” لا للمحاكمات العسكرية للمدنيين” واللجنة الشعبية لحماية الثورة بامبابة لحضور المؤتمروالشعبي المقام في امبابة , في حضور أهالي المعتقلين و المحكوم عليهم من المحاكم العسكرية و الاستاذ أحمد راغب المحامي وأحد أعضاء لجنة الدفاع.

انضموا لنا في الشارع.

العنوان :شارع المستوقد-مساكن عزيز عزت-امبابه
يوم الخميس الموافق 14 أبريل فى تمام الساعه 7:00 مساء

شهادة رائف محمد الكاشف – من داخل السجن

أسمي  رائف محمد الكاشف، عمري 22 سنة، طالب بمعهد إدارة الأعمال في أكاديمية المدينة بالسنة الثانية.

قبل ثورة 25 يناير مكانش ليا أي هدف، و كنت كل إللي بعملو إني أروح الجامعة و أصرف فلوس أو أنزل أقف مع جيراني على الناصية أو نخرج خروجة حلوه.

قلت لأخويا (راجي) لما نزل الشارع يوم 25 يناير و أنا معاه إن المظاهرات خلصت خلاص. لكن نزلت أصلي الجمعه معاه يوم 28 يناير عشان كنت خايف عليه و مش عايزه يكون لوحده مع إني عارف إن صحابه كلهم من شباب الثورة.

وقفنا لجان شعبية وكنت بقابل ضباط الجيش في الهرم وأحاول أساعدهم في القبض على البلطجيه و المساجين الهاربين من سجن الفيوم في منطقه “حدائق الأهرام” لمده 4 أيام. بعدها يوم 1 فبراير نزلت إعتصمت مع راجي في ميدان التحرير عشان يرحل رأس الفساد.

ونزلت تاني يوم 25 فبراير قبل أخويا ما ينزل لأني مكنتش مقتنع بأحمد شفيقعلى رأي الهتاف “أل بونبوني أل..أل فاكرنا عيال”وأحنا مش عيال..أحنا شباب سنين الفساد خلتنا نعرف مصلحتنا فين و مع مين. النهاية كانت لما مشي أحمد شفيق كان في مطالب تانية للثورة بس كان مضايقني إن الناس مش شايفة غير “حسني مبارك و عصابتة” و سايبين أهم حاجه و هو الدستور إللي كان لازم يتغيير عشان مايجيش ديكتاتور تاني يحكمنا.

الأربعاء 9 مارس 2011، الساعه 3:10

جت مظاهرة بتقول “الشعب يريد إخلاء الميدان” وبعدين رموا علينا طوب و إحنا ردينا عليهم و كان أخويا وقتها مش في الميدان.

الساعه 4:15..جت مسيره تانيه مدنيين “معاهم سلاح” و فرقة 999 بتاعت مكافحه الإرهاب الدولي (!!!) وكانوا رافعين صليب و بيقولو هتاف “الجيش و الشعب إيد واحده” وكان أخويا لسه مكلمني و قاللي إنه جي في السكه.. أول المسيرة ما قربت من الميدان رموا الصليب على الأرض و صاحوا ” هههاااااااااااااااا” و هجموا على الميدان جابوا عليه واطيه. (جريت و أخدت الخيمه معايا) و كان ابويا معايا وقتها رحنا وديناها مكتب نشر للكتب أسمة (ميريت) كان أخويا بيروحه لاصحابه هناك. سبت أبويا هناك مع الخيمه و رجعت عشان أقابل أخويا و أقوله إحنا رحنا فين لقيتهم (ضابط جيش و حوالي 7 بلطجيه) ماسكينه ضرب و رايحين به ناحية المتحف، فجريت عليهم وقلتهم ” دا أخويا” حاولوا يبعدوني عنه، فرميت نفسي عليهم و قلت للضابط ” و النبي خدني معاه..دا أخويا  والنبي خدوني معاه” فخدوني و أخويا مسكني و جري بيا ناحية المتحف عشان منتضربش من (بلطجيه الشعب).

حوه المتحف إستقبلني عساكر الحيش بروسيه و شلالايت و بونيات لغايت ما وصلت قدام باب المتحف الخارجي و ربطوا إيدي ورا ظهري و عموا عينيا بعصابه  و رموني على وشي على الأرض وسط ناس كتير قوي كنت سامع صراخهم و كأنهم بيتسلخوا بس عرفت هما ليه بيصرخوا لما جه العساكر و ضربوني ..كنت وقتها قدرت أنزل الغمامه من على عيني و أشوف اللي بيحصل..كانوا بيضربونا كأننا مش مصريين و أعداء الوطن و الشايم كانت نازله علينا زي السيل الكهربا بالعصيان الكربائيه كل ربع ساعه، حاولت أستحمل و أدعي أن أخويا يكون بخير وسط الناس دي اللي كان عددهم تقريباً 250 واحد.

بعد 6 ساعات من الضرب شفت أخويا لما كانوا بيصورنا في الشارع اللي ورا المتحف (بين المتحف والحزب الوطني)، ولاحظت إن اللي صورنا بالكاميرات دي هما نفسهم اللي كانوا بييجوا عند الميدان و يقولولنا “قاعدين ليه..خربتوا البلد..الله يخرب بيوتكوا”و الحقيقه انهم ميعرفوش ربنا خالص، والدليل المدبحه اللي حصلت من شويه.

وقفنا صف تفتيش، فتشني اتنين مدنيين و خدوا مني 20 جنيه و الساعه و الموبايل و ضربوني علي وشي عشان أطلع أركب الأوتوبيس.

ركبنا الأوتوبيس بتاع الجيش و راح بينا على (س 28 – مقر المحكمه العسكريه) في مدينه نصر و مخرجناش منه لغايت الصبح من غير أكل أو شرب. و بعدين حوالي الساعه 3 العصر كده يوم 10 مارس 2011، رحنا السجن الحربي من غير ماننزل من الأوتوبيس.

قابلت أخويا في الاوتوبيس و قلت له “متخافش انا كويس” رد عليا و قال “مكانش لازم تعمل كده“. وبصيت على الناس معانا لقيت 3 صحاب راجي أخويا و الباقي إما من المعتصمين في التحرير أو ناس ملهاش فيه أو أطفال لكن ولا واحد منهم بلطجي.

جوه السجن الحربي وقفنا صف واحد في ساحه مدخل السجن و أمرونا بخلع الهدوم كلها للتفتيش و اللي كان لابس حزام جلد كان بيتضرب به.

حوالي الساعه 6 مساءاً قالولنا النيابه جت تحقق معاكم. دخلنا واحد واحد للتحقيق (الضابط و الكاتب على مكتب و الناس على الأرض) و وراهم عسكري ماسك عصاية الكهربا. سألني سؤال واحد “أنت كنت بتعمل إيه في التحرير؟” قلت له “كنت مع أبويا و أخويا في وسط البلد بنشتري حاجات“..ودي قصة قلتها أنا و أخويا عشان ميعرفوش يقولا علينا كان معاهم مولوتوف أو سكاكين.

خرجت و بعد ساعه دخلنا مجموعه على المحكمه العسكريه (اللي كانت في “الميز” مطبخ الجيش) و محدش منهم سمع كلمه مننا والقاضي أثناء مرافعه المحامي اللي أنا معرفهوش كان مش مهتم بالكلام و وكيل النيابه كان ماسك موبايله بيبص فيه.

خلصت التمثيليه بعد نص ساعه طبعاً لأن وقت الحلقه خلص، و دخلونا الزنازين في سجن أسمه (3 منتظرين) و كنت مش عارف بكره هيحصل إيه؟؟!!

يوم 12 مارس 2011، حوالي االساعه 10 بليل جت العساكر و نادو على أخويا و علي صبحي و محمد طارق من الزنزانه و راحوا إفراج.

بعدها دخل علينا يوم 13 مارس مجموعه تانيه كان ضمنهم عمرو أسماعيل صاحب راجي و عمرو عيسى زميلي في الزنزانه و صاحب راجي. يوم 22 مارس جت العساكر و قالولنا إفراج لكنهم ضحكوا علينا و ركبونا عربيه ترحيلات الداخليه لسجن أسمهشديد الحراسه جوه سجن طره المزرعه وعرفت بعدين لما راجي و أبويا دخلوا لزيارتي إني واخد حكم بسنه واحده سجن و التهم( حيازة مفرقعات و أسلحه بيضاء، تخريب عمد، تعطيل الطريق، تخريب ممتكات عامه و خاصه، خرق حظر التجوال- وهما قبضوا عليا الساعه 4 العصر ومن غير مايكون معايا حاجه، و استعمال القوه).

بقالي هنا في السجن 3 أسابيع مش عارف إيه اللي هيحصل لأهلي و دراستي، مش عارف ايه اللي حصل ده أصلاً..بس عرفت هدفي إيه هيكون ..هدفي هو تطهير البلاد من الفساد اللي قبض علينا و اللي لسه بيحكم و يتحكم فينا حتى الأن.

Witnesses of torture شهود على التعذيب

On 16th of March the Liberties Committee at the press syndicate hosted a press conference in which families of detainees facing military trials & recently released/tortured detainees, shared with us their stories.

This is Al Masry Alyoum’s video coverage of that day (Eng subtitles) Witnesses of torture.

في يوم 16 مارس دعت لجنة الحريات بنقابة الصحافيين مؤتمر صحفي شاركنا فيه أهالي المعتقلين الذين يواجهون محاكمات عسكرية, و المعتقلين الذين أفرج عنهم مؤخرا و تعرضوا للتعذيب, قصصهم.

فيديو المصري اليوم عن هذا اليوم… شهود على التعذيب